विधानसभा निवडणुकीतील पराभवानंतर ठाकरे गटासाठी संकटे वाढतच आहेत. आगामी स्थानिक स्वराज्य संस्थांच्या निवडणुकांसाठी पक्षाने जोरदार तयारी सुरू केली असली, तरी नेत्यांची आणि कार्यकर्त्यांची गळती काही थांबताना दिसत नाही. परभणी, छत्रपती संभाजीनगर, मुंबई, कल्याण, ठाणे, भिवंडी येथे अनेक पदाधिकारी शिंदे गटात गेले असून, आता कोकणातील इनकमिंगवर राजकीय वर्तुळात चर्चा रंगली आहे. उपमुख्यमंत्री एकनाथ शिंदे यांनीही याबाबत सूचक विधान करत मोठ्या घडामोडींचे संकेत दिले आहेत. त्यामुळे ठाकरे गटासमोरील आव्हाने आणखी वाढणार का, याकडे सर्वांचे लक्ष लागले आहे.
राज्यात शिवसेनेतील इनकमिंग आणि आउटगोइंगची जोरदार चर्चा सुरू असताना, शिंदे गटाने ‘ऑपरेशन टायगर’ आणि ‘ऑपरेशन धनुष्यबाण’ राबवण्याचे संकेत दिले आहेत. शिंदे गटाच्या नेत्यांनी दावा केला आहे की, ठाकरे गटातील अनेक आमदार आणि खासदार त्यांच्या संपर्कात असून, लवकरच मोठा निर्णय होऊ शकतो. गेल्या काही दिवसांत विविध जिल्ह्यांतील अनेक पदाधिकारी आणि कार्यकर्त्यांनी ठाकरे गटाला सोडून शिंदे गटात प्रवेश केला आहे. आगामी महानगरपालिका आणि स्थानिक स्वराज्य संस्थांच्या निवडणुकांच्या पार्श्वभूमीवर ही गळती उद्धव ठाकरेंसाठी मोठे आव्हान ठरू शकते. उपमुख्यमंत्री एकनाथ शिंदे यांच्या सूचक विधानांमुळे या घडामोडींना आणखी वेग आला असून, राज्याच्या राजकीय वर्तुळात चर्चांना उधाण आले आहे.
महायुतीचे नेते आणि शिंदे गटातील पदाधिकाऱ्यांनी महाविकास आघाडी आणि ठाकरे गटातील काही खासदार लवकरच शिंदे गटात येणार असल्याचा दावा केला आहे. उपमुख्यमंत्री एकनाथ शिंदे यांच्या वाढदिवसानिमित्त अनेक पदाधिकारी आणि नेत्यांनी त्यांची भेट घेतली. यावेळी त्यांच्या विश्वासू पदाधिकाऱ्यांपैकी एकाने, “आता बोलू नका, आपले काम सुरु आहे,” असे सूचक वक्तव्य केले. यावर प्रतिक्रिया देताना, शिंदे यांनी, “आम्ही कोणत्याही प्रकारची फोडाफोडी करत नाही, जे येत आहेत ते स्वेच्छेने येत आहेत,” असे सांगत राजकीय हालचालींना वेग दिला आहे.
दरम्यान, आनंद दिघे यांच्या जीवनावर आधारित चित्रपट सुपरहिट झाल्यानंतर आणि विधानसभेच्या राजकीय चित्रपटाने मोठी उलथापालथ केल्यानंतर, आता तिसरा सिनेमा तयार करण्याची वेळ आली आहे, असे सूचक विधान उपमुख्यमंत्री एकनाथ शिंदे यांनी केले. “तो कोणता आणि त्याचे नाव काय, हे माहित नाही, पण तो नक्कीच सुपरहिट होणार,” असे शिंदे यांनी स्पष्ट केले.
