येत्या ५ डिसेंबरला नव्या सरकारचा शपथविधी होणार असल्याची माहिती भाजपचे प्रदेशाध्यक्ष चंद्रशेखर बावनकुळे यांनी दिली. पंतप्रधान नरेंद्र मोदी या सोहळ्यात उपस्थित राहणार आहेत. या सोहळ्याची तयारी सुरू आहे. मात्र, राष्ट्रवादी अजित पवार गटाचे नेते छगन भुजबळ यांनी शपथविधीवर मोठं वक्तव्य केल्याने शपथविधीच्या तारखेविषयी संभ्रम निर्माण झाला आहे.
मुख्यमंत्रिपदाबाबत अजूनही सस्पेन्स कायम असून नव्या मुख्यमंत्र्याचे नाव जाहीर झालेले नाही. तसेच ५ डिसेंबरला नव्या सरकारचा शपथविधी होणार असल्याची माहिती भाजपचे प्रदेशाध्यक्ष चंद्रशेखर बावनकुळे यांनी ट्विटद्वारे दिली. या शपथविधीवर प्रतिक्रिया देताना छगन भुजबळ यांनी म्हटले की, शपथविधीसाठी मोठी तयारी करावी लागते, आणि जर राज्यपालांना वाटले तर शपथविधी ६ डिसेंबरलाही होऊ शकतो. यामुळे शपथविधीबाबत संभ्रम निर्माण झाला आहे.
दरम्यान, एकनाथ शिंदे गृहमंत्रिपदासाठी आग्रही असल्याची माहिती समोर आली आहे. यावर प्रतिक्रिया देताना छगन भुजबळ यांनी सांगितले की, गृहमंत्रिपदावरून कोणताही पेच नाही, आणि निर्णय थोडा उशिरा झाला कारण पंतप्रधान आणि केंद्रीय गृहमंत्री अमित शहा एका कॉन्फरन्समध्ये व्यस्त होते. भुजबळ यांनी गृहमंत्रिपदाच्या महत्त्वावर भाष्य करत सांगितले की, गृहमंत्री पद हे सोपं नाही, कारण या पदावर असताना अनेक गंभीर समस्यांशी संबंधित निर्णय घ्यावे लागतात. ते म्हणाले, “मी गृहमंत्री असताना गँगवार सुरू होते, काळी दिवाळी साजरी होत होती.” एकनाथ शिंदे यांच्याशी चर्चा करून मार्ग काढला जाईल, असं भुजबळ यांनी सांगितलं.
